Ogohlantirishsiz tekshiruvlar: 2025-yil aprel va maydan biznes uchun nimalar o‘zgaradi

2025-yil bahoridan boshlab, 2025-yil 27-fevraldagi 78-sonli PQ qaroriga asosan soliq tekshiruvlarini o‘tkazish tartibida muhim o‘zgarishlar kuchga kiradi.
Agar ilgari ko‘plab tekshiruvlar haqida tadbirkorlar oldindan xabardor qilinsa, endilikda ayrim hollarda ogohlantirishsiz tekshiruv o‘tkazilishi mumkin. Hatto ayrim — kichik — qoidabuzarliklar uchun ham darhol sayyor soliq tekshiruvi boshlanishi ehtimoli bor.

Noqulay vaziyatga tushib qolmaslik va ortiqcha xatarlarni oldini olish uchun, qaysi buzilishlar tanqidiy hisoblanishini oldindan bilish juda muhim.

2025-yil 1-apreldan boshlab, soliq organlari xodimlari tomonidan 4-ilovada keltirilgan soliq huquqbuzarliklari aniqlanganda:

• birinchi marotaba ogohlantirish beriladi;
• ogohlantirishdan keyin uch kunlik muddatda huquqbuzarliklar bartaraf etilmasa yoki qayta aniqlansa, bu holat sayyor soliq tekshiruvini o‘tkazishga asos bo‘ladi;
• sayyor soliq tekshiruvi faqat 4-ilovada ko‘rsatilgan soliq huquqbuzarliklari bo‘yicha o‘tkaziladi va uning o‘tkazilishiga faqat “Yagona davlat nazorati” axborot tizimida ro‘yxatdan o‘tgan holda va Biznes-ombudsmanni xabardor qilish tartibida 24 soat ichida ruxsat beriladi;
• sayyor soliq tekshiruvi yakunlari bo‘yicha rasmiylashtirilgan dalolatnoma sayyor soliq tekshiruvi bo‘yicha qaror qabul qilish uchun asos bo‘ladi.

2025-yil 1-maydan boshlab, tadbirkorlik subyektlarini tekshiruv boshlanishi haqida kamida 10 ish kuni oldin xabardor qilish talabi quyidagi holatlarga tatbiq etilmaydi:

• avtomatlashtirilgan “Soliq xavfini aniqlash, tahlil qilish va baholash” dasturi natijalari asosida olib boriladigan, soliq bazasini yashirish (kam ko‘rsatish) holatlari bo‘yicha o‘tkaziladigan soliq tekshiruvlariga.

Bundan tashqari, tadbirkorlik subyektlari tomonidan soliq imtiyozlaridan foydalangan holda daromad solig‘i va ijtimoiy soliq bo‘yicha hisoblangan soliq summasini kamaytirishga olib keluvchi takroriy hisobotlarni qabul qilish tartibi joriy etiladi.
Bu tartib soliq organlari tomonidan ushbu hisobotlar asoslanganligini o‘rganish natijalari bo‘yicha amalga oshiriladi.

Soliq organlari xodimlari tomonidan ularga biriktirilgan korxonalar yoki mahallalardagi tadbirkorlik subyektlarida o‘tkaziladigan tekshiruvlar
RO‘YXATI

1. Nazorat-kassa texnikasini va (yoki) hisob-kitob terminallarini qo‘llash tartibini buzish.
2. Mehnat faoliyatini amalga oshiruvchi xodimlarni hamda mehnatga haq to‘lash fondini soliq hisobotida aks ettirmaslik.
3. Yer maydonlaridan hujjatlarsiz yoki yer uchastkasiga bo‘lgan huquqni tasdiqlovchi hujjatlarda ko‘rsatilganidan kattaroq hajmda foydalanish.
4. Foydali qazilmalarni noqonuniy qazib olish yoki qazib olingan foydali qazilmalar hajmini soliq hisobotida to‘liq aks ettirmaslik.